Pormal nang gisugdan ang pagpangandam alang sa ika 35 nga Piyesta pahinungod sa atong patron San Lorenzo Ruiz. Pinangulohan ni Reverendo Padre Jed Matela, gisugdan ang maong pagpangandam niadtong June 30, 2022 diin gitambongan kini sa Parish Pastoral Council nga adunay tagsa tagsa ka mga tahas sa umaabot nga selebrasyon.
Lakip sa mga nasabutan mao ang mga pangalan sa mga muselebrar sa mga Novena Mass sa sulod sa siyam ka adlaw .
Lakip usab sa mga nasabutan ang maong opening salvo sa tibook selebrasyon sa kapistahan, diin ipahigayon ang naandnag motorcade sa imahen sa atong mahal nga patron. Ang tema sa selebrasyon sa kapistahan karong tuiga mao “Dungan ta sa Paglakaw, Niining Hiniusang Panaw Uban si San Lorenzo Ruiz.” Nagtuyok ang maong tema sa kinatibuk-ang selebrasyon sa Simbahang Katolika nga mao ang Synod on Synodality.
Uban usab sa nasabotan ang pagpangita sa mga Hemano ug Hermana of the Day sa Maong Piyesta, diin ang maong adlaw adlaw nga misa paga sponsoran niining mga Hermano-Hermana. Karon, nagpadayon na ang pag duaw sa mga prospects nga himuong Hermano-Hermana of the day. Kini gibuhat alang sa pagpakigsabot ug agig tabang sa pag decide sa atong mga Hermano-Hermana nga giyahan sila sa pag-tando, ug personal kining gibuhat sa atong padre kura.
Agi og pagpangandam usab sa umaabot nga kapistahan sa atong parokya, ipahigayon ang Visita Patronal o pagbisita sa imahe sa atong patron nga si San Lorenzo Ruiz ngadto sa nagkalain-lain nga zone. Kini nga kalihokan nagtumong sa paghatag ug kahibalo sa umaabot nga fiesta ug pagpalambo sa debosyon kang San Lorenzo Ruiz. Magsugod ang maong kalihukan karong umaabot Septyembre 6, 2022.
Ang atong parish fiesta novena magsugod karong umaabot Septyembre 16, 2022, Biyernes. Apan sa dili pa, ipahigayon usa ang “Opening Salvo” sa Septyembre 15, 2022, 4:00 sa hapon. Giawhag ang matag kapilya sa atong parokya sa pagsalmot niining maong motarkada agi og pag-abli sa atong ika-35 ka tuig nga kasaulogan isip usa ka parokya nga magtotoo sa Dios uban ang pangama og pangaliya ni San Lorenzo Ruiz..
Busa, agig awhag sa atong mga kaparian, nga padayon ang pag supporta sa mga kalihukan sa atong simbahan, ilabi na alang sa umaabot nga selebrasyon sa ika 35 nga tuig nga selebrasyon sa kapistahan sa pagkasantos sa atong patron San Lorenzo Ruiz. San Lorenzo Ruiz, Ig-ampo mo kami. Viva San Lorenzo Ruiz!
Comments